E vierschdimmige Marsch wo vo myne Kindhaitserinnerige z Basel verzellt und verschiidene Stazioone wie s erschty Buech und s erscht Piccolo. Ainzelny Szeene, Yydrigg, Figuure in Stadt und um d Stadt wo sich poeetysch vermische dien wie bim Fellini sym glyychnoomige Film...

 

S Haupttheema in C-Dur isch e freydig-beschwingty Dreiklangsmelodie im 6/8-tel Taggd wo sich in G-Dur wiiderholt und am Schluss vom Värs 1 au der aane moduliert. S Theema vom Värs 2 bringt zeerscht wiider die Uffstyygendi Quart, denn aber abschtyygendi Sekunde. Obwohl är in C-Dur stoot versetzt aim dr Jambus und s e-moll (wos denn au aanegoot) iine nächtligy, sinnierendy Stimmig wo immer wiiderkunnt. Värs 3 im straalende A-Dur isch e freydigi Fortspinnyg vom Haupttheema wo erscht inn dr Wiiderhoolyg duure Napoleddaner wiider noochdängglyg und vom 2te Värs mitem Jambus abgleest wird. Aber au dismool goots denn freydig-beschwingt wyter: In G-Dur wird dr Jambus underbroche, u.a. im Bass dur die unbeschweerte Achtel. Värs 5 bringt e quiirlig-beschleynigdi Variazioon vom Haupttheema, wiider im straalende A-Dur wo im Värs 6 in a-moll wytergfiert wird. Dr 7ti Värs bringt aim aabe vo de Gässli und de glayne, gschitzte Schauplätz in d Freye-Strooss richtig Märtplatz wo aim denn die ganzi Wält uffgoot. In C-Dur heertme im Voordersatz s meloodisch umkeerte Haupttheema im halbe Tämpo in 3-/4tel. Dr Noochsatz und dr Värs 8 mit de Verdichtyge und Seqquänze isch als liebevoll-umaarmendi Erkläärig vom gheerte dänggt. S folgt aimol mee dr 2-ti Värs wo, obwool wortweertlyg glyych, dismool e ganz anderi Wirggyg entfaltet. Värs 9 moduliert mitere wytere Variazioon vom Haupttheema freydig-beschwingt zrugg noch C-Dur wo am Schluss dr Erscht noonemol wiiderhoolt wird und dr Marsch denn fertig isch.

 

 

 

 

 

 

 

 

 

Amarcord (29.01.2021)