Im Novämber 2018 isch dr Kurt, my Babbe gschtorbe. Als glaine Bueb het är und syni Eltere mi vom Morgartering inn d Stadt mitgnoo a Morgestraich, an d Laddärne-Usschdellig, an Cortège und schtundelang go Gässle. Au myni erschde Klaviereebe, Sinfoniekonzärt und Opere hani mit ihm kenne go loose, z Basel im Casinosaal und im Theater. Är isch sy Lääbe lang Basler gsi und bliibe und het drfir gsorgt dass au mir und mym Brueder d Liebi zer Stadt und ihrem Dialäggd erhalte bliibe isch.

 

Im Unusswyychlig luegi zrugg uff syni letschde drei Joor, won är hart und unermiedlig kämpft hett geege sy Grangged und myni grosse Schwiirigkayte, s Unusswyychlige z aggzeptiere und ihn los z loo.

 

Hauptmoddyyv isch, entgeege dr klassisch-uffschdyygende Mannhaimer-Raggeedde im 'Rümpfli', dismol e langsangsam Abfallendy, im erschde Värs in dr Hauptdoonart a-moll. S zwaite Modyyv im brobiert mit dr Usswyychig inn d Paralleldoonart C-Dur e Verseenig, erschd dr dritty Värs, e Variazioon vom Zwayte schaffts denn aber C-Dur z etabliere. Dr viert Värs resigniert mitem Hauptmoddyv in e-moll und noch dr Modulazioon am Schluss kunnt im Fimfde s Kinderlied vom Fuchs / em Jääger wo gschdoole het in d-moll. Värs 6 im parallele F-Dur bringt d Momänt vor Hoffnig in Erinnerig woni dänggd ha dass ärs no e baar Jeerly wurd schaffe...

Aber denn, unusswyychlig in c-moll schdoot wider s Haupttheema, mir ischs vorkoo wie im erschde Satz vom Ludwig sire Klaviersonate c-moll 'Pathétique'. Im zwaite Dayl hanis denn aber mit vyyle scheene Erinnerige an C-Dur-Stigg wooni mit mym Babbe gloost ha, kenne ufflöse: Dr achti Värs blibt im firmi seer Ärdverbundene und klare C-Dur, vergglärt s 'mild und ruehig' vom Zwaite und s 'hoffnigsvoll' vom Dritte. Ych ha wider Luft griegt und bi nochem Komponiere aifach nume no danggbar gsi dass är mir d Muusig so nooch brocht het und my sy Lääbe lang drin underschditzt und verschdande het!

 

Dr Unusswyychlig isch vierschdimmig und bruucht zwingend e Bass-Piccolo

 

 

dr Unusswyychlig (19.07.2019)