E vierschdimmige, unkonvenzionelle Marsch, frey noch em 'Promenade'-Theema vom Modest Moussorgsky

 

Mäng Ayne wo em Moussorgsky syni 'Bilder einer Ausstellung' s erschdmoll gheert het isch ganz verdutzt gsii ob de dailwyys rächt brachiaale Theeme won är aifach aanenandergrait het und dr unkonvenzionelle Form mit Taggd- und abrupte Richtigs- und Doonartewäggsel. Sogar musykaalischy Blasfemyy ischem voorgworfe worde... Ych hamer dänggt, sogar das miessty doch mitem Basler-Piccolo irgendwie funggtzioniere!

 

Värs 1 in G-Dur bringt e grefftigy, freiy Noochempfindig vom 'Promenade'-Theema in G-Dur und 3/4-Taggd mit dr Tonika erscht uffe zwaity Schlaag und ere fascht Barogge Schlussgrubbe wo gfyylt z frie kunnt... iiberschriibe ischer mit 'blasfeemysch'. Värs 2 bringt zerschd e Fortschbinnyg vom Erschde mit dr abschtyygende Quint statt dr uffschtyygende Quart (wo s zwaite Mol e Schlaag z frie yysetzt) iiberem Orgelpunggt A, denn e Wiiderhoolig vom Erschde Värs wider mitere Barogge Schlussgrubbe, wo dismol aber gfyylt z lang isch ;-)

Värs 3 in e-moll bringt zwai wiiderhoolti 5-Schlaaggruppe mit dr abschtyygende Quart, und ere (noch ere Achtelschtauyg) verzierte Wäggselnoote ibere Bassdoonlaitere. Noch ere Generalpause wiider e Variazioon vor barogge Schlussgrubbe. Värs 4 bringt s Haupttheema lyyslig in g-moll. Dr Schluss kunnt gfyylt z frie, drfiir gits no e aaghängti Generalpause. Värs 5 in B-Dur fiert die zwaity Figuur vom Theema duure und ändet s erschtmol in g-moll, s zwaitmol in G-Dur. Dr 6-ti Värs bringt s Haupttheema triumfierend und diräggd in C-Dur iibere Drioolebeweegig undeme 'falsche' Schluss. Värs 7 bringt e lyyrischi, formal verschoobeni Variazioon vom 5-te in C-Dur und aabermols e Schluss uff dr Dominante, dismol sogar als Septakkord und mit Fermaadde. Freelig frisch kemme im Värs 8 baidy Theemefragmänt mitenand verschmolze und ere barogge Schlusssegguänz derhär. Im 9-te Värs wird s 5-Schlaag-Theema vom Dritte in a-moll wiiderholt, gfolgt vore lengere, lyyrische Segguänz im 10-te wo au säll Theema duurefiert. Im 11-te Schlussvärs kunnt fanfaareglych s Haupttheema zrugg und noochere usslaadende, fascht eweng patheeddysche Schlussschtaygerig kunnt dä Märsch zumene Änd.

 

Nochdäm y miteme mulmige Gfyyl inn die erschd Broob bi hanni denn aber schnäll gmerggd wie guet dä Marsch funggtzioniert und aimol mee gschduunt was uff deene Ultrasoprän alles meeglig isch. Vyl Freyd bim Pfyffe!

 

 

 

Mousse-au-Chocolat (16.01.2021)