E dreischdimmigs, freeligs aber verzwiggts Märschli gschriibe fire Gérald
Nochem beklemmende 'Druurmarsch' isch em Gérald sy Wunsch nocheme freelige und aaschbruchsvolle Märschli fir my genau richdig koo!
Die erschde baide Värs sinn freelig-beschwingty Schbiilereye in D-Dur und h-moll mit de verschiidene Moddyyv vom Haupttheema: Si wärde umkeert, duuregfiert, phaaseverschoobe segguänziert bis alles in h-moll ändet. Abem dritte Värs dominiert e numme indiräggt vo der erschte baide abglaitets neys Theema mit dr Bsunderhait dasses im Dritte zerscht in zwaimol 7 Schleeg gfolgt vo zwaimol 5 Schleeg komponiert isch. Dr Viert in h-moll blybt denn bir 5-Schlag Abfolg, s Theema isch aber im Rhythmusmoddyyv umdrüllt und in dr donaale Abfolg (fascht) gschbieglet. Dr 6ti Värs bringt e fulminanty Eruptzioon vom themaaddische Material in A-Dur mit aaspruchsvolle Pralltriller und emene segguänzierte zwaite Theemedail. Dr Schlussvärs 7 bringt zerscht e Widerhoolyg vom Erschde, s Theema wird aber denn zwaimol underbroche und dr Marsch schliesst ire beschleynigde Schlusssegguänz.
Wär dä Marsch pfyfft mues nur uffbasse dass sech d Finger und / oder d Fiess bym Marschiere nid verzwigge!