E vierschdimmige, ruehige Marsch mit eweng Wältschmärz und Pathos...

 

Ungweenligy Akkordschdellyge, mit Nääbe-Septakkörd harmoonisierty und beddoonty Vorhält und e drioolischy 'Verschleppig' bringe e wyynerlig-patheetyschy Wältschmärzschdtimmig im erschde Värs in F-Dur. Värs 2 foot uff dr Dominante C-Dur a und isch e kontraschdierendy Fortspinnyg mit eme neye 16-tel Moddyyv und wiiderum ere drioolische Verschleppig im Noochsatz mit Schluss zrugg in F-Dur. Baidi, Värs 1 und 2 schliesse mitere abschtyygende drioolische Dreiklangsbrächyg. Dr dritt Värs bringt s Hauptthema, zerscht protzig, denn immer reduzierter bis zemene rueige Schluss. Dr viert Värs in B-Dur bringt e ney Theema usem 16-tel Moddyyv wies am Aafang vomene Marsch kennty stoo und schliesst in F-Dur. Die abschtyygend Dreiklangsdrioole isch Theema vom Värs 5 wo vo C-7 noch F-Dur goot und glyych schliesst wie die erschde baide Värs. Es folgt wiiderum dr Dritt Värs mitem erstäärbende Haupttheema. Inn der Värs 6-8 ischs Theema zämmegschrumpft uffene 4-tel / punggdierty 8-tel / 4tel Figuur wo mit de aaschliessende Drioole und Verschiebyge vom punggdierte Moddyyv e patheetyschy Wirggyg entfaltet, zerscht im ungweenlyge b-moll, drnoo uff dr Dominante F-Dur und schliesslig im schdraalende B-Dur. Zem Schluss kunnt noonemol dr erstäärbend dritty Värs und dr Marsch goot in F-Dur wyynerlig im Wältschmärz z änd wiener aafgange het.

 

Au bi däm Marsch hany am Schluss dänggt hey, das hani doch schoonemol gheert... Heyo, inn dr Yylaityg vom Bluemewalzer usem 'Nussknacker' ;-)

 

 

 

 

 

dr Patheetysch (08.02.2021)