E zwaite vierschdimmig-feschtlige Marsch mit erwyddereder Harmoonigg und vyl Blatz fir d Tamboure. Fir nostalgischy aber au progressyyvi Clique!
S Oeuvre vor tradizionelle Basler Faasnachtsmusyg isch voll vo heerlige Zyddaad, verdoonte Sammlige und Paraphraase vo Melodie und Theeme uss aller Wält, aagfange mit de 'Alte Schwyzer' iber die ganze schottische Verdoonige vom Lukas Burckhardt, de kanadische und amerikanische Miliddärmarsch-Transkriptzioone vom René Brielmann und em Beery undsowyter... Ab und zue gits au ebbis vomene groosse 'klassische' Maischter wie im Lumpi oder Brunnemarsch.
Doodrby het mir perseenlig immer em Wolfi si 'Nachtmusyg' gfäält und zem das noochehole hany dä Marsch gschriibe. Drby hanni mer vorgschdellt wie heerlig s wurdi syy wenn amene Mittwuch noch de Niine die versammlete Garde voore Grossclique wurde schtooblyybe und mit grossem Traraa 7-ti Värs in Basler Nachthimmel wurden uffschtyyge loo: Und so isch bi däm Marsch alles uff die wunderscheen Hauptmelodie vom zwaite Satz vom Wolfi ussgrichted wo denn inn de Värs 6-7 kunnt. Aber beraits dr erscht Värs in G-Dur leent sich aa an Wolfis erschde Satz. Rhythmisch baue die 3 geege 2 und d Achtelpause zämme mit de schtändige, fascht obsessyyve Widerhoolige vom zwaite Dail vom Moddyyv, en unerbittligy Schbannig uff. Dr 2 Värs in e-moll isch beraits en Uffbau zer schböddere feschtlyge Entlaadyg im Höhepunggd vom Marsch und alli drei Moddyyv (Taggd 1 / Taggd 2 / Täggd 3-4) wärde im Verlauf vom Marsch duuregfiert (verwuurschtlet und denn wider anderscht zämmegsetzt). Am Schluss fiert e knabbi Modulazioon inne fascht gaischterhaft, unhaymlige Dritte Värs in cis-moll mit eme formal verkürzte Moddyyv im 3/4-Taggd. D Erleesig kunnt in A-Dur miteme duuregfierte zwaite Moddyyv ussem 2-te Värs im ruehige 2/4-Taggd. Wiene Echo kunnt im 5-te Värs denn s erschde Theema inn dr glyyche Doonart, A-Dur, die am Änd vom Värs wie unverruggbar etabliert schyynt. Värs 6 und 7 bringe denn s heerlige Haupttheema ussem zwaite Satz vor 'Glayne Nachtmusyg', zerscht ruehig in D-Dur, denn mit vollem Traraa inn dr Hauptdoonart G-Dur. Värs 8 bringt e Variazioon vom Värs 2 mitere Phaaseverschoobene Duurefierig vom dritte Moddyyv inere Quintfallsegguänz wo am Änd vo 2 Generalpause underbroche wird. E patheetyschi Wiiderhoolyg vom erschde Värs bringt dä Marsch zum Schluss.