E dreischdimmigs, freeligs und schalgghafts Pfyffermärschli in Rondoform, komponiert firs Trio 'Rigéfi'.
Doomer immer viily verschiideny Fragmändd im Kopf ummeschwirre und y seer induyddyyv und assoziaddyyv komponier erschduun y mängmool sälber was am Änd uusekunnt: Wie diemool die Verddoonyg und Umsiidlyg vom 'Rumpelstilzli' vo de Gebrieder Grimm nach Basel!
Die erschde baide Värs in G-Dur gheere zämme, s Bsundere draa isch dasses mitem Dominantseptakkord aafoot und sech die schnälle, fräche Voorschleeg vor zwaite Wiiderhoolyg vom Värs 1 aaschliessend durs ganze Stiggly duurezie. Dr dritty Värs in e-moll, e Wyterfierig vom Zwaite, isch denn beraits komplett drvoo iberzooge. Am Schluss vor erschde Wiiderhoolyg schdoot en abschdyygende chromaaddische Doonlayteredail. Värs Vier bringt e bekannti Glaykindermelodie in D-Dur, und wirggd dur d Quinteparallele, dr Wiiderhoolyg e Ganzdoon heecher in E-Dur und die zwaytaggdige abschdyygende Chromaaddig schböddisch und eweng verruggd (s Gnöömli danzt schaadefreydig ums Fiir!). Noochem Rondodail Värs 5 kunnt im säggsde Värs e Zyddaat vom Ludwig, s Haupttheema vom Klavierstigg 'die Wut über den verlorenen Groschen'. Noch dr virdduoose Bassyylaag hani mer in dr Kadänz denn voorgschdellt dass em Gnöömli zoberscht amene Basler-Bärg s Piccolo uss de Händ gheyt und d Schtapfle durab grollt isch. Doodrmit isch dr Bann broche gsii, verdutzt und entzauberet hets im 7te Värs (en Umkeerig vom Haupttheema) die fyyrligi Faasnachtsprozessioon uff sich lo wirgge und im letschde Rondodayl denn wiider freydig und beseelt mitpfyffe!