E vierschdimmige Marsch mit progressyyver Harmonigg und (vor allem) Form!

 

Genauso wie an d Faasnacht hänn mi my Babbe und d Grooseltere beraits als glaine Bueb immer im Herbscht an d Mäss mitgnoo: Wo isch obe, wo isch unde, wie ka ebbis glyychzytig um alli Aggse drülle und denn au das immer wider anderscht? Genau das Duurenanderfliesse vo Fixpünggd und Perschpeggdyyve hani i däm Marsch brobiert feschtzhalte. Uusekoo isch e formaaly Ellipse, wo uff dr aine Syte d Krimmyge vom Krais gschtuuchdt, uff dr andere deendt wärde.

 

Värs 1 in a-moll und 3/4-Taggd bringt drei Moddyyv, zwai im erschde Taggd wo beschleynige, ains im Zwaite wo verlangsamt. Beraits in de Täggd 3 und 4 wird dur d Umkeerig und d Widerhoolige vo de erschde baide Moddyyv e elliptysche Soog erzygt. Värs 2 in C-Dur bringt dur die umene 8-tel verschoobene 16-tel und die baide Iiberbindyge mit de glyyche Moddyyv e ganz anders Gfiil fir Proporzioon / uffe und abe. Im dritte Värs, immer no C-Dur wärde die baide erschde Moddyyv und Iiberbindyge mitenand vermischt und näbschd em glyyche Effäggd fir Uffe und abe kunnt dur die baide unglyyche und asymmeeddrische formale Proporzioone (11 Taggdschleeg im Vordersatz, 17 im Nochsatz) zuesätzlig e Sytwärtsbeweegig derzue. Aber nur kai Angscht: Ych ha guet uffbasst dass alles mitem Laufe uffgoot! Värs 4 isch wider in a-moll und kombiniert alli drei Moddyyv so mitenand dass wiider völlig anderi Effäggd entschdeen, dito Värs 5: Was immer iir denn drmit assoziiered isch sälbverschtändlig eych ganz perseenlig iiberloo! Im Värs 6 in D-Dur ischme noch all deene Baanfaarte und em Zueluege denn am Zuggerwaddeschtand wome dr Maa (oder d Frau) seet die siessy Watte im Kessel drülle. Värs 7 isch wiene Echo vom Erschde bevor me denn in dr Coda inn de letschde baide Täggd zfriide und begaischteret vom Daag uff dr Mäss dehaim in Schloof versinggd.

 

Sälbverständlig darf me dä Marsch au aifach pfyffe ooni das alles z verschdoo, mitem Laufe goot alles uff, verschbroche!

 

 

 

 

uff dr Mäss (24.08.2019)